Hohoko 'o e famili Manumu'a 'o Navutoka

Malo 'etau ma'u e 'aho fakakoloa ni pea fakatauange 'oku tokamalie e me'a kotoa.
Fakatulou atu mo kimoutolu kotoa pe kae fai atu ha fakahoha'a mei he Tou'one Siliva 'o e Funga 'Onetaka.
Ko e finemotu'a au ko Losaline Peauola ko 'eku fa'ee ko 'Ana ko e 'ofefine ia 'o Manumu'a (Filimone Niumotu'u) pea mo Latu. Ko e fanau eni 'oku 'i ai 'eku fa'ee:
1. Tupou Kaniseli (T) (pekia kei si'i)
2. Kavakava (T) pekia, na'e mali mo e fefine ko 'Ana mei Ovaka, Vv
3. Seini Vatea (F) pekia
4. Fangunakaetau (T) pekia, na'e mali mo e fefine ko 'Alailupe
5. Lesinali Moala Tamate (T) pekia, na'e mali mo e fefine ko Melino mei 'Eua
6. 'Ana (F) pekia, ko 'eku fa'ee eni pea na'e mali mo e tangata ko Hesekaia Vaohingano Fakatou mei Felemea, Hp
7. Mo'unga (T) 'oku mali mo 'Akesa mei Kolonga
8. Uili (T) pekia, na'e mali mo 'Ele Manu
9. Tupou Kaniseli (T), tauhingoa ki he fika 'uluaki 'o e fanau ni, mali mo 'Ima mei Ma'ufanga
10. 'Aisea (T) pekia, na'e mali mo 'Ofa Veikune.

Ko 'enau tamai, Manumu'a Filimone Niumotu'u, na'e 'i ai hono tokoua ko Mala'efo'ou na'e mali mo Mele Kaivao, pea mo hono tuofefine ko Solia na'e pa'a 'ikai hano hako. Ko 'enau matu'a ko e tamai ko Pala'imaea, ko e fa'e ko Papa ko e fefine mei 'Eua. Ko Pala'imaea na'e 'i ai hono ongo ta'okete ko Moala Tamate mo Fakafuli pea mo honau tuofefine ko 'Atu, pea ko 'enau matu'a ko e tamai ko Latu Hema mei Kolomotu'a pea ko e fa'ee ko Fisi'inukonuka mei Navutoka, pea ko e fa'ee leva 'a Fisi'inukonuka ko Nukuvao Lahi mei Navutoka. Ko Papa na'e 'i ai hono fanga tuonga'ane mo e tokoua 'a ia ko Solo, Poso'a, Misi-o-Tupou, Lota, Fihaki, mo Susana, pea ko 'enau fa'ee ko Fakalelu, 'a ia na'e 'i ai hono fanga tokoua mo e tuonga'ane ko Latu, Malia Toutou, mo Masia, pea ko 'enau fa'ee ko Monika.

'Oku 'i ai mo e fakamatala 'e taha 'oku pehe ko Pala'imaea (tamai 'a Manumu'a Filimone Niumotu'u) na'e mali ia mo Kalolaine Kete Koula Vakalahi Taufa 'o 'i ai 'a Manumu'a Filimone Niumotu'u, Solia, Mala'efo'ou. Ko Kalolaine Kete Koula Vakalahi Taufa ko e lahi taha ia he fanau 'a Kaufusi Vakalahi Taufa mo 'Alailupe Vakaliu (fefine Navutoka)pea ko e toenga 'o e fanau koeni ko Kalesita Vakalahi Taufa, Siua Kavakava Taufa, Taina Vakalahi Taufa, Mele Nau Taufa, Meli Vakalahi Taufa, pea mo Filipe Vakalahi Taufa. Ko Kaufusi Vakalahi Taufa, tamai 'a Kalolaine Kete Koula Vakalahi Taufa, ko e tama ia hono 4 'a 'Elina Kete Koula Taufa, pea ko e toko 3 kimu'a 'ia Kaufusi ko Melekiseteki Taufa, Filipe Taufa Tongilava, mo Netane Taufa.

Ko 'enau fa'ee, 'a Latu Manumu'a, mali 'o Manumu'a Niu Motu'u, ko e tama ia 'a Seini ko e 'ofefine 'o Malakai ko e foha 'o Lolomana'ia mei Mu'a. 'Oku 'ikai ha'aku ma'u pau ki he hohoko e famili koeni 'o e matu'a 'a Latu Manumu'a. 'Oku 'i ai e fehokotaki 'a Latu Manumu'a mo e famili 'o Lausi'i Hopoate, Kefu, Tu'ifua, Manulevu, Sateki Pale, Sofele Kakala, Kavaefiafi 'i Mu'a ka 'oku 'ikai ke u ma'u 'a e fehokotaki'anga mo e hohoko 'o e famili.

Ko ia 'oku ou 'oatu e fakamatala ni ke mou vakai ki ai 'o fakatonutonu mai he 'oku 'ikai ke u fakapapau'i 'a e mo'oni 'o 'eku fakamatala 'i 'olunga. Fakamolemole 'o tokoni mai.

'Ofa atu kiate kimoutolu kotoa
Losaline